Оборонена перша докторська дисертація на русинському языку
(Svitova akademiia rusyns’koi kul’turŷ/World Academy of Rusyn Culture, 8 January 2007)
Братислава, Словакія У посдіднє десятилітя мы стали свідками ширеня научного інтересу до історії ай культуры русинôв по цілому світу. Дакôлько талантливых молодых ученых из рôзных держав, котры ся притримувуть припущеня же русины суть отдільным народом, дôстали докторськый ступінь од ведучых унівчерзитетôв за дисертації из дисциплін історії, лінґвістики, літературознавства, музиколоґії ай соціолоґії. Меджи цими науковцями мож назвати імена Олены Дуць-Файфер (оборонила дисертацію у Яґеллонському універзитеті в Польщі у 1997 році), Леноры Декарло (Флоридськый державный універзитет, 1998) Александра Тойча (Гейдельберґськый універзитет, Німеччина, 2001), Евы Міхны (Яґеллонськый універзитет, Польща, 2001), Марка Штейґерра (Універзитет імени Людвіґа-Maксиміліана в Мюнхені, Німеччина, 2002) ай Богдана Горбаля (Вроцлавськый універзитет, Польща, 2005).
Недавно до сего списку ся долучила и дисертація на русинську тему Анны Плішковов, котра у новембрі 2006 р. дôстала ступінь доктора філософії од Інститута славянськых студій имени Яна Станіслава Словацької академії наук у Братиславі. Доктор Анна Плішкова, котра од 1999 р. учить на Одділені русинського языка ай літературы Пряшôвського універзитета, была такой и стипендіатков Стипендиї Степана Чепы из предмета русинськых студій при Торонтському універзитеті в Канаді. Ментором єї дисертації «Списовный язык карпатьскых Русинів: проблемы становліня, кодіфікації, акцептації і сфер функціонуваня» быв знаный славіст, універзитетськый професор, доктор філософії Ян Доруля.
Унікальнов робить дисертацію доктора Плішковов факт, же вшиткый текст сесеї роботы написано на русинському літературному языку. Появліня сеї дисертації є не лем тріумфальным персональным досягненям доктора Плішковов, оно є історичным моментом, котрый указує, же научный світ узнає єствованя русинôв як отдільного славянського народу ай факт же русинськый язык може быти хоснованый у научных публикаціях. Бизовно, доктор Анна Плішкова указала иншакым молодым науковцям, же не лем мож розробляти научні проєкты на русинські темы, ай друковати їхні результаты на русинському языку.
Return to the 2007 News Archive index
